ئاسۆ و ئاشتی یش؟؟

ئاسۆ و ئاشتی له‌به‌رچی؟
به‌داخه‌وه‌ هه‌واڵی به‌ستنی دوو حه‌وتوونامه‌ی ئاسۆ و ئاشتی بڵاوبۆته‌وه‌ و ئه‌و فه‌زا بچووکه‌ رۆژنامه‌گه‌رییه‌ش غه‌دری زێده‌تری لێکرا و ئیداره‌ی ئیرشادی ئیسلامی، له‌بری یارمه‌تیدانی زێده‌تر بۆ چاره‌سه‌رکردنی دۆخی قه‌یراناوی هه‌نووکه‌یی و کردنه‌وه‌ی درگاگه‌لێکی نوێ بۆ دیالۆگ و ...، به‌داخستنی ئه‌و دووحه‌وتوونامانه‌ گوشارێکی زێده‌تر ده‌خاته‌سه‌ر رووناکبیران و قه‌له‌م به‌ده‌ستان و رۆژنامه‌وانانی کورد و ئه‌مه‌ش نه‌ک هه‌ر هیچ یارمه‌تییه‌ک نادات بۆ چاره‌سه‌ری و له‌گرفت ده‌رچوونی هه‌نووکه‌یی ئه‌وان، به‌ڵکوو رۆژ له‌دوای رۆژ دۆخه‌که‌ ئاڵۆزترو ناخۆشتر ده‌کاو ... هه‌تا کوی نازانم.. ره‌نگه‌ سبه‌ینێ بۆ ‌مه‌یدان دانی دووباره‌ به‌و بلاڤۆکانه‌، دێر بێت...
به‌ش به‌حاڵی خۆم /وه‌ک رۆژنامه‌گه‌رێکی کورد/ به‌توندی ئه‌و کاره‌ی ئیرشادی ئیسلامی مه‌حکووم ده‌که‌م و داوا ده‌که‌م هه‌موو نووسه‌ران و رۆژنامه‌وانانی کورد له‌به‌رامبه‌ر ئه‌و کاره‌دا ناره‌زایی خۆیان به‌ شێوه‌ی نووسراو ئاراسته‌ بکه‌ن و داوای ئازاد بوون و سه‌رله‌نوێ بڵاوبوونه‌وه‌ی ئاسۆ و ئاشتی بکه‌ن.... به‌و هیوایه‌وه‌

رووداوه‌کانی مه‌هاباد و..

رووداوه‌کانی مه‌هابادو شاره‌کانی دیکه‌ی کوردستانی ئێران نیشانه‌ی ئه‌و راستییه‌یه‌ که‌ ره‌نگه‌ هه‌زاران جار گوتراوه‌ وئه‌ویش داخوازی هه‌نێ مافی ره‌واو به‌ر حه‌قه‌ که‌ به‌داخه‌وه‌ هیچکام له‌ ده‌سه‌ڵاتدارانی ئێران (له‌ میژووی درێژخایه‌ندا)ملیان نه‌داوه‌تێ و به‌رده‌وام گوێیان لی کپ کردوه‌ و هه‌وڵی سه‌رکوتکردنیان به‌ شێوه‌گه‌ل جۆراوجۆر بۆ داوه‌ و هه‌رگیزیش نه‌گه‌یشتوونه‌ته‌ ئه‌نجام... بۆ وه‌ی کوشت و بڕ له‌ هیچ کوێی دنیا نه‌یتوانیوه‌ بۆ هه‌میشه‌ سه‌پۆشێک بێ بۆ خواستی به‌رحه‌قی نه‌ته‌وه‌یی و هه‌وڵ و خه‌باتیان.. به‌تایبه‌ت له‌ سه‌ده‌ی دوای بیستدا که‌ هه‌موو نه‌ته‌وه‌کانی جیهان به‌و راستییه‌ گه‌یشتوونه‌ که‌ ده‌بێ بتوانن به‌ ئازادی و ئاشتی و به‌ شێوه‌ی دێمۆکراسییانه‌ پێکه‌وه‌ بژین و کێشه‌کانیان به‌ دیالۆگ و ئاخاوتن چاره‌سه‌ربکه‌ن نه‌ک کوشت و بڕ و سه‌رکوتکردنی یه‌کدی و .... ئه‌وه‌ی گوێ له‌م راستییه‌ی مێژوو ده‌خنێ ناچار ده‌بێ به‌ره‌نگاری نه‌ته‌وه‌ ببێته‌وه‌ و نه‌ته‌وه‌ش هه‌رگیز نامرێ!